BE paraqet rregulloren e re etike pas “Qatargate”

Gjashtë muaj pas skandalit të “Qatargate”, që lidhet me komplotin e dyshuar të korrupsionit që përfshiu Parlamentin Evropian, Komisioni Evropian ka nisur reformën e rregullave të sjelljes së brendshme për të gjitha institucionet e BE-së. Reforma, e premtuar në fillim të mandatit të presidentes së BE-së, Ursula von der Leyen, parashikon, ndër të tjera, rregullat tashmë në fuqi për pranimin e udhëtimeve, mikpritjen dhe dhuratat e ofruara nga palët e treta për anëtarët e institucioneve; standardet e transparencës për takimet palët e interesuara; detyrimi për të deklaruar interesat, pasuritë dhe udhëtimet që lidhen me detyrat e dikujt; kërkesat e transparencës edhe për ish-anëtarët dhe zyrtarët. Masat do të jenë ligjërisht të detyrueshme. Megjithatë, organi i përbashkët etik nuk do të ketë fuqinë për të nisur hetime ose për të vendosur sanksione, prerogativa që mbeten në duart e zyrës së BE-së kundër mashtrimit (OLAF), prokurorit evropian (Eppo) dhe Gjykatës së Drejtësisë së BE-së. “Njerëzit në të gjithë Evropën nuk e dallojnë nëse një skandal e ka origjinën në një institucion apo në tjetrin. Prandaj, nëse duam të mbetemi të besueshëm në sytë e tyre, ne të gjithë duhet t’i nënshtrohemi standardeve të përbashkëta etike”, tha zëvendëspresidentja e BE-së, Vera Jourova, duke theksuar se demokracia mund të lulëzojë vetëm nëse qytetarët kanë besim në institucionet e tyre. Takimi i parë për fillimin e dialogut dhe negociatat ndërmjet të gjitha institucioneve dhe organeve konsultative të BE-së do të zhvillohet të hënën më 3 korrik, në Bruksel. atsh