Ministrat e Jashtëm të BE-së u takuan sot në Luksemburg, në një përpjekje për të arritur një qëndrim të përbashkët për krizën në Lindjen e Mesme dhe mbështetjen për Ukrainën ndërsa lufta kundër Rusisë po hyn në dimrin e dytë. Ministrat e BE-së do të diskutojnë gjithashtu armëpushimin humanitar midis Izraelit dhe Hamasit në Gaza, i kërkuar nga Kombet e Bashkuara”, tha kryediplomati i BE-së, Josep Borrell. Thirrja e OKB-së u mbështet nga disa vende të BE-së, duke përfshirë Spanjën, Irlandën dhe Holandën, ndërsa vende të tjera si Gjermania dhe Austria e kanë kundërshtuar këtë qasje duke theksuar të drejtën e Izraelit për vetëmbrojtje. “Do të ketë paqe dhe siguri për Izraelin dhe palestinezët vetëm nëse luftohet terrorizmi”, tha ministrja e Jashtme gjermane, Annalena Baerbock. “Ne nuk mund ta shmangim katastrofën humanitare nëse terrorizmi i Gazës vazhdon kështu”, tha Baerbock duke shtuar se i takon Hamasit të ndalojë përkeqësimin e situatës. “Armëpushimi për të lejuar dërgimin e ndihmave humanitare dhe furnizimeve mjekësore mbetet një çështje urgjente maksimale”, tha ministri i Jashtëm irlandez, Micheál Martin. Borrell theksoi rëndësinë e dërgimit të ndihmave humanitare në Rripin e Gazës. Çështja se si BE-ja mund të ndihmojë në parandalimin e një përshkallëzimi rajonal të konfliktit do të diskutohet gjithashtu nga ministrat. Krahas krizës në Lindjen e Mesme, ministrat po i kushtojnë vëmendje edhe disa konflikteve të tjera në dhe përreth Evropës, si lufta e Rusisë në Ukrainë dhe përshkallëzimi midis Azerbajxhanit dhe Armenisë. “Ne duhet të sigurohemi që edhe Ukraina të kalojë këtë dimër me mbrojtjen më të mirë të mundshme”, tha Baerbock, duke theksuar angazhimet e mëparshme të Berlinit për muajt e dimrit. Ministrat e Jashtëm të BE-së duhet të diskutojnë në muajt e ardhshëm, angazhimet e planifikuara të sigurisë nga Perëndimi. Borrell ka sugjeruar marrjen e zotimeve financiare afatgjata për ndihmën ushtarake dhe gjithashtu përdorimin e parave të BE-së për të mbështetur shpërndarjen e avionëve luftarakë dhe raketave moderne. Në mënyrë të veçantë, Borrell ka kërkuar mobilizimin e 5 miliardë eurove (5.3 miliardë dollarë) çdo vit nga 2024 deri në fund të 2027. Në takimin e sotëm nuk priten vendime të mëdha. Një numër shtetesh anëtare të BE-së deri më tani kanë hezituar të ndërmarrin angazhime të reja financiare afatgjata për Ukrainën. Gjithashtu, pas takimit do të zhvillohen bisedime me përfaqësuesit e Kazakistanit, Kirgistanit, Taxhikistanit, Turkmenistanit dhe Uzbekistanit.
