Ministrat e Jashtëm të Bashkimit Evropian shprehën keqardhje për përkeqësimin e situatës humanitare në Gaza ndërsa mbërritën në një takim në Bruksel, pjesë e të cilit është edhe lufta e Rusisë kundër Ukrainës. “BE-ja po bën thirrje për krijimin e pauzave të menjëhershme dhe korridoreve humanitare për të përballuar situatën e rëndë të banorëve në Gaza”, tha shefi i çështjeve të jashtme të BE-së, Josep Borrell. Luftimet e ashpra pranë spitalit kryesor të Rripit të Gazës kanë rritur shqetësimet për fatin e stafit dhe pacientëve, ndërsa furnizimet me karburant po shterrojnë shpejt duke zgjeruar krizën humanitare midis civilëve palestinezë. Forcat e Mbrojtjes të Izraelit (IDF) thanë se Hamasi ka një qendër kontrolli nëntokësore pranë spitalit. “Pacientët në kujdesin intensiv nuk kanë asnjë alternativë. Nuk ka oksigjen, nuk ka ujë, nuk ka ilaçe, kështu që këta banorë do të vdesin”, tha ministri i Jashtëm i Luksemburgut, Jean Asselborn. “Ne i kërkojmë Izraelit të tregojë vetëpërmbajtje maksimale për të shpëtuar civilët”, tha Borrell. Shtetet e BE-së lëshuan dje një deklaratë të përbashkët në të cilën ata përsëritën dënimin e tyre për përdorimin e civilëve si mburoja njerëzore nga Hamasi. Lufta në Rripin e Gazës nuk është konflikti i vetëm në axhendën e sotme. Megjithatë, lufta e Rusisë kundër Ukrainës dhe pasojat e operacionit ushtarak të Azerbajxhanit kundër armenëve në territorin e diskutueshëm të Nagorni-Karabahut, kanë zënë vendin e dytë të konfliktit në Lindjen e Mesme.
