BE, 82.6 milionë euro për reformat në procesin e integrimit

Bashkimi Evropian do të financojë në Shqipëri 82.6 milionë euro përmes instrumentit IPA 3, për të mbështetur vijimin e reformave kryesore në vend që kanë kontribut të drejtpërdrejtë në procesin e integrimit. Këshilli i Ministrave miratoi sot marrëveshjen e financimit midis Shqipërisë dhe KE-së, në kuadër të programit 2022 për instrumentin e paraanëtarësimit, ose siç njihet IPA 3. Kryenegociatorja Majlinda Dhuka deklaroi sot, pas mbledhjes së qeverisë se, paketa IPA 3 që qeveria e miratoi sot, përfshin asistencë ndaj Shqipërisë prej 82.6 milionë euro. “Kjo asistencë do të mbështesë disa nga reformat kryesore të vendit me kontribut të drejtpërdrejtë në procesin e integrimit evropian. Më konkretisht, BE do të mbështesë agjencitë e zbatimit të ligjit në vlerën 14.9 milionë euro, fazën e tretë të procesit të rivlerësimit të përkohshëm të gjyqtarëve dhe prokurorëve në vlerë 9.7 milionë eurosh, vazhdimin e mbështetjes për reformën e drejtësisë që Shqipëria po zbaton dukshëm me rezultate dhe impakt”, u shpreh Dhuka. Po ashtu, shtoi Kryenegociatorja, “përmes një shume prej 5 milionë eurosh synohet forcimi i rolit të parlamentit dhe KQZ-së në demokraci, si dhe reformën thelbësore të ujit, me një vlerë prej 29 milionë eurosh”. “Ndërsa për instrumentin lehtësues për integrimin evropian që mbështet procesin e negociatave akordohet fondi prej 19 milionë eurosh. Për të mbështetur iniciativat e rinisë shqiptare, për të ndërtuar mundësi të reja në vendin tonë, përmes IPA 3 akordohet fondi 5 milionë euro”, tha Dhuka. atsh