Shqipëria mbetet e angazhuar për të ecur përpara në reformat administrative dhe institucionale të kërkuara dhe në përafrimin e legjislacionit shqiptar me atë të BE. Komisioni Evropian dhe delegacioni shqiptar i kryesuar nga zëvendësministrja dhe Negociatorja e Ministrisë së Financave dhe Ekonomisë, Vasilika Vjero zhvilluan në Bruksel, takimin shpjegues për Kapitullin 29 “Bashkimi Doganor”. Në kuadër të përafrimit të legjislacionit shqiptar me atë të BE, ”Bashkimi Doganor” është pjesë e rëndësishme në procesin e integrimit Procesi i shqyrtimit është një mundësi për t’u njohur më shumë me praktikat, politikat dhe legjislacionin e BE-së të aplikuara prej vitit 2019. Progresi i vendit në Kapitullin 29 “Bashkimi Doganor” është vlerësuar në raportin e KE-së për Shqipërinë për vitin 2022, duke theksuar punën përgatitore për zhvillimin e Sistemit të Ri të Kompjuterizuar të Transitit, zbatimin e programit të operatorit të autorizuar ekonomik (OAE), vlefshmërinë e suksesshme të standardeve të sigurisë dhe sigurisë në përputhje me Protokollin Shtesë 5 të CEFTA-s, zbatimin e rregullave kalimtare të origjinës në pan – Zona Euro-Mesdhetare dhe fuqizimi, dixhitalizimi i shërbimeve, etj. Më herët, një delegacion tjetër shqiptar i kryesuar nga zv.ministri dhe Negociatori i Ministrisë së Financave dhe Ekonomisë, Besart Kadia dhe Komisioni Europian zhvilluan në Bruksel, takimin shpjegues për Kapitullin 6 “Legjislacioni për shoqëritë tregtare” dhe për Kapitullin 7 “E drejta e pronësisë intelektuale”. Negociatori i kapitullit, Kadia është shprehur se “Kapitulli 6” mbi legjislacionin për shoqëritë tregtare përfshin rregulla për formimin, regjistrimin, bashkimin dhe ndarjen e shoqërive. Në fushën e raportimit financiar, acquis specifikon rregullat për paraqitjen e llogarive vjetore dhe të konsoliduara, duke përfshirë rregullat e thjeshtuara për ndërmarrjet e vogla dhe të mesme. Zbatimi i Standardeve Ndërkombëtare të Kontabilitetit është i detyrueshëm për disa subjekte me interes publik. Përveç kësaj, acquis specifikon rregullat për miratimin, integritetin profesional dhe pavarësinë e auditimeve ligjore. Për Kapitullin 7 “E drejta e pronësisë intelektuale”, zv.ministri Kadia tha se “procesi i integrimit të Shqipërisë në BE është prioritet strategjik kombëtar, që udhëheq axhendën qeverisëse të vendit, ndërkohë që ekipi i MFE është i angazhuar në zbatimin e reformave themelore në rrugën drejt Bashkimit Evropian”. Kapitulli 7 parashikon mbrojtjen e të drejtave të autorit dhe të drejtave të pronësisë industriale. Ai parashikon rregulla të harmonizuara për mbrojtjen ligjore të drejtave të autorit dhe të drejtave të tjera të lidhura me to. Dispozita specifike zbatohen për mbrojtjen e bazave së të dhënave, programeve kompjuterike, topografive gjysmëpërçuese, transmetimit satelitor dhe ritransmetimit kabllor. Në fushën e të drejtave të pronësisë industriale, acquis përcakton rregulla të harmonizuara për mbrojtjen ligjore të markave tregtare dhe dizenjove. Dispozita të tjera zbatohen për shpikjet bioteknologjike, për produktet farmaceutike dhe produktet për mbrojtjen e bimëve. Përveç kësaj, acquis përcakton një markë dhe dizenjo komunitare dhe parashikon rregulla të harmonizuara për zbatimin e të drejtave të autorit dhe të drejtave të pronësisë industriale. Në procesin e Integrimit Europian, Ministria e Financave dhe Ekonomisë drejton 13 kapituj dhe 2 kapituj me bashkënegocim, nga 33 kapituj gjithsej, si dhe Kriterin Ekonomik.http://ata.gov.al/2022/10/21/bashkimi-doganor-pjese-e-rendesishme-ne-procesin-e-integrimit/
- Advertisment -