AZHBR:46 sipërmarrje financim granti 6 milion euro

Agjencia për Zhvillim Bujqësor dhe Rural ka mbështetur përmes programit IPARD, investimet e reja në teknologji dhe pajisje sipas standardeve të BE-së për 46 sipërmarrje, në sektorin e vreshtarisë dhe prodhimit të verës, me vlerë granti 6 milion euro. Vreshtaria dhe prodhimi i verës janë ndër aktivitetet, të cilat zënë një vend të rëndësishëm në ekonominë dhe të ardhurat në zonat rurale. Varietetet e shumta të vreshtave krijojnë mundësi për prodhimin e verërave autentike dhe cilësore. Këto investime, të realizuara në kuadër të programit IPARD II, konsistojnë në zgjerimin e mbjelljeve të vreshtave, përmirësimin e mekanikës bujqësore, pajisje për prodhimin e verës, si edhe në linja përpunimi dhe ambalazhimi të produktit. Teknikat e reja të aplikuara kanë sjellë rritje të rendimentit dhe cilësisë së prodhimit, gjithashtu kanë krijuar modele të suksesshme të zhvillimit për ekonominë dhe eksportet shqiptare. atsh