Avancimi i forcave ukrainase në ofensivën jugore

Disa brigada të Forcave të Armatosura në Ukrainë kanë shtuar zjarret e artilerisë në zonat e vijës së parë në të gjithë Ukrainën jugore, njoftoi sot Ministria Britanike e Mbrojtjes. Sulmet me precizion me rreze të gjatë veprimi të Ukrainës vazhdojnë të pengojnë linjat ruse të furnizimit, të cilat Londra i përshkroi si “të brishta”. Sipas ministrisë, nuk është ende e mundur të konfirmohet sesa mund të kenë avancuar forcat ukrainase. Gjysmë viti pas pushtimit rus në Ukrainë, udhëheqja ushtarake në Kiev sinjalizoi se po niste operacionet për të rimarrë zonat në të gjithë jugun. “Linja më e largët e mbrojtjes e Rusisë në rajonin e Khersonit është sulmuar në disa vende”, tha ushtria ukrainase. Zëdhënësi i Këshillit të Sigurisë Kombëtare, John Kirby vuri në dukje se Ukraina për javë të tëra po telegrafon dhe po përgatitet për një kundërsulm në jug, duke e detyruar Rusinë të tërheqë pajisjet dhe trupat nga rajoni lindor i Donbasit.https://ata.gov.al/2022/08/30/londer-bm-avancimi-i-forcave-ukrainase-ne-ofensiven-jugore-i-paqarte/