Australia ngre nivelin e kërcënimit nga terrorizmi

Agjencia e shërbimit të brendshëm sekret të Australisë, ASIO, ka ngritur nivelin e kërcënimit nga terrorizmi në vend në “të mundshme” në mes të një rritjeje të ekstremizmit, tha sot drejtori i përgjithshëm i agjencisë. Shefi i ASIO-s, Mike Burgess tha se mjedisi i sigurisë në Australi ishte më i paqëndrueshëm dhe më i paparashikueshëm dhe se vendimi nuk ishte “marrë shpejt apo lehtë”. “Më shumë australianë po përqafojnë një gamë më të larmishme ideologjish ekstreme dhe më shumë australianë janë të gatshëm të përdorin dhunën për të çuar përpara kauzën e tyre”, tha ai në një deklaratë. “Dhuna e motivuar politikisht tani i bashkohet spiunazhit dhe ndërhyrjes së huaj si shqetësimet tona kryesore të sigurisë”, theksoi ai. Ai tha se trendi u rrit gjatë Covid-19, fitoi vrull të mëtejshëm pas sulmeve terroriste në Izrael dhe u përshpejtua gjatë përgjigjes ushtarake të Izraelit. “Individët po përqafojnë ideologji kundër autoritetit, teori konspirative dhe ankesa të ndryshme. Disa po kombinojnë besime të shumta për të krijuar ideologji të reja hibride,” tha ai. Burgess tha se sulmet ka të ngjarë të ndodhin me pak ose aspak paralajmërim dhe do të ishin të vështira për t’u zbuluar. ”E mundshme nuk do të thotë e pashmangshme… Australianët duhet të jenë të vetëdijshëm, por jo të frikësohen”, deklaroi Burgess