Sekretari amerikan i Mbrojtjes, Lloyd Austin, gjatë një vizite në Kiev i tha presidentit ukrainas Volodymyr Zelensky se mbështetja e Uashingtonit do të jetë afatgjatë. “Mesazhi që ju sjell sot, zoti president Zelensky, është se Shtetet e Bashkuara të Amerikës janë me ju dhe ne do të qëndrojmë me ju për një afat të gjatë,” i tha Austin Zelenskyt, i cili nga ana e tij vlerësoi vizitën e Austin si një “sinjal shumë të rëndësishëm”. “Austin, në vizitën e tij në Kiev u shoqërua nga gjenerali Christopher Cavoli, komandanti i përgjithshëm i trupave amerikane në Evropë”, sipas ambasadores së SHBA-së Bridget Brink. Pentagoni tha se Austin kishte zhvilluar një bisedë telefonike me ministrin ukrainas të Mbrojtjes Rustem Umerov, në fundjavë. Kievi dhe aleatët e tij po përgatiten për takimin e së mërkurës të Grupit të Kontaktit të Mbrojtjes së Ukrainës, i cili mbledh së bashku rreth 50 vende të interesuara për të mbështetur Kievin në luftën e tij kundër Rusisë.
