I lindur më 16 shkurt 1949 në Fier, Arqile Lipe u farkëtua artistikisht në skenën e Estradës së Fierit, e krijuar më 5 maj 1957, një institucion që do të bëhej vatër e humorit kombëtar. Pikërisht në këtë trupë ai ndërtoi profilin e tij, mes një brezi aktorësh që i dhanë tonin viteve më të arta të estradës.
Në vitet ’80, kur estrada e Fierit ishte në kulmin e saj, Lipe u shndërrua në një nga emrat më të dashur për publikun, me interpretimet në parodi dhe komedi që mbetën gjatë në kujtesë, përfshirë “Telefoni i ri”, “Do martojmë Malon”, “Ç’luftë e ngatërruar” apo “Për një copë litar”.
Në skenë ai interpretonte përkrah kolegëve të tij, mes tyre edhe Todi Llupi, duke krijuar një dyshe e ansambël që u bë identifikues për publikun fierak. Me humor të drejtpërdrejtë, ritëm fantastik e tipizim të fortë karakteresh, ata ndërtuan një traditë që e bëri estradën e Fierit referencë kombëtare në vitet ’80.
Më pas, me krijimin e Teatrit “Bylis” aktorët e estradës – mes tyre edhe Lipe – i dhanë ton shumë premierave të përbashkëta në teatër dhe komedi.
Sot, në ditëlindjen e tij, Arqile Lipe kujtohet me respekt si një nga emrat që përfaqëson më qartë traditën e humorit fierak dhe kontributin e çmuar të Estradës së Fierit në kulturën shqiptare.
