Ambasada gjermane në Tiranë njoftoi se projekti ‘ACTUS, for Vjosa’, i mbështetur edhe nga kjo ambasadë, në kuadër të Javëve të Kulturës Gjermane “Tetori Gjerman 2022”, është përzgjedhur si finalist për çmimin “New European Bauhaus 2023“. Ky projekt frymëzues bashkoi artistë shqiptarë dhe evropianë për të krijuar një performancë kërcimi bashkëkohor për Vjosën, e cila është shpallur tashmë zyrtarisht Parku i parë Kombëtar i një lumi të egër në Evropë. Sipas njoftimit të Ambasadës Gjermane në Tiranë, për Çmimin “New European Bauhaus 2023“, nga më shumë se 1450 aplikime, janë përzgjedhur 61 finalistë, duke treguar se projekte të bukura, të qëndrueshme dhe gjithëpërfshirëse ekzistojnë në të gjithë BE-në dhe në Ballkanin Perëndimor. Çmimet e reja evropiane Bauhaus 2023 janë të hapura për aplikime nga shtetet anëtare të BE-së. Për herë të parë janë të hapura edhe për Ballkanin Perëndimor. Çmimet do të japin deri në 30,000 euro për iniciativa shembullore që lidhin qëndrueshmërinë, estetikën dhe gjithëpërfshirjen – tre vlerat plotësuese të Bauhaus-it të Ri Evropian. Çmimet do të jepen në katër kategori tematike: Rilidhja me natyrën; Rifitimi i ndjenjës së përkatësisë; Duke i dhënë përparësi vendeve dhe njerëzve që kanë më shumë nevojë dhe Nevoja për të menduar afatgjatë, të ciklit jetësor në ekosistemin industrial. atsh
- Advertisment -