Ministrat e Jashtëm të 13 vendeve kanë paralajmëruar Izraelin në një letër kundër një ofensive ushtarake gjithëpërfshirëse në qytetin jugor të Rripit të Gazës, Rafah, sipas një raporti mediatik. Gazeta gjermane ‘’Süddeutsche Zeitung’’ raportoi në edicionin e së premtes se ‘’nënshkruesit kërkuan gjithashtu më shumë ndihmë për popullsinë palestineze’’. Të gjitha vendet kryesore të industrializuara në Grupin e Shtatë (G7) nënshkruan letrën me katër faqe të datës së mërkurë, përveç Shteteve të Bashkuara. Në letrën drejtuar ministrit të Jashtëm Israel Katz, ministrat nënvizuan të drejtën e Izraelit për vetëmbrojtje dhe dënuan sulmet terroriste nga Hamasi dhe grupet e tjera islamike më 7 tetor. Në të njëjtën kohë, ata i bënë thirrje qeverisë së kryeministrit Benjamin Netanyahu që ‘’të bëjë gjithçka në fuqinë e saj për të lehtësuar krizën shkatërruese dhe përkeqësuese humanitare në Rripin e Gazës’’. Sipas artikullit ata gjithashtu i kërkuan Izraelit ‘’të hapte të gjitha pikat kufitare në brezin bregdetar për ndihmë humanitare, duke përfshirë kalimin Rafah me Egjiptin’’.
