Kalaja, rrugët dhe rrugicat e Beratit presin mijëra vizitorë çdo ditë në të gjitha stinët e vitit. Bashkia e Beratit vijon përditë punën për mirëmbajtjen dhe ndriçimin në rrugën e Kalasë, e cila gumëzhin nga turistët edhe në orët e mbrëmjes. Kryetari i bashkisë së Beratit, Ervin Demo në një postim në rrjetet sociale tha se “këto janë punë të vogla, por bazike për një qytet turistik. Kalaja madhështore duhet të jetë perfekte në çdo aspekt, për kënaqësinë e vizitorëve dhe krenarinë e vendasve”. Kalaja është ndërtuar mbi kodrën shkëmbore në formë trekëndëshi, me perimetër të mureve 1440 m, me 24 kulla e me dy porta. Kulla e hyrjes së brendshme është e bërë nga blloqe guri, që u përkasin fortifikimeve ilire, të cilat janë ndërtuar në shekujt IV-II para Krishtit. Brenda kalasë ndodhen rreth 14 kisha, të cilat e kanë bërë mjaft të dëgjuar atë.
