Sekretari amerikan i Shtetit, Antony Blinken mbërriti sot në Kiev, në një vizitë të paparalajmëruar. “Blinken mbërriti në Ukrainë për t’u takuar me zyrtarë të lartë ukrainas dhe për të theksuar mbështetjen e qëndrueshme të Shteteve të Bashkuara për Ukrainën”, tha zëdhënësi i Departamentit të Shtetit të SHBA, Matthew Miller. ”Blinken do të takohet me presidentin Volodymyr Zelensky, kryeministrin Denys Shmyhal dhe ministrin e Jashtëm Dmytro Kuleba për të “diskutuar përditësimet në fushën e betejës, ndikimin e sigurisë dhe ndihmës ekonomike të SHBA-së, sigurinë afatgjatë dhe angazhime të tjera si edhe punën e vazhdueshme për të forcuar rimëkëmbja ekonomike e Ukrainës”, vazhdoi Miller. ”Blinken do të theksojë angazhimin e Amerikës ndaj sovranitetit, integritetit territorial dhe demokracisë së Ukrainës përballë agresionit të vazhdueshëm të Rusisë”, shtoi Miller. Kjo është vizita e katërt e Blinken në Kiev që nga pushtimi rus i Ukrainës në shkurt 2022, pasi Kievi aktualisht po përballet me një ofensivë të re në verilindje të vendit. Javën e kaluar, qeveria amerikane njoftoi një paketë të mëtejshme ndihme ushtarake për Kievin që arrin në rreth 400 milionë dollarë, përfshirë municione për sistemin e mbrojtjes ajrore ”Patriot”, raketa-hedhës shtesë HIMARS me municione si dhe raketa antiajrore ”Stinger” dhe municione artilerie. Në fund të prillit, pas muajsh bllokimi të brendshëm politik, Kongresi Amerikan miratoi miliarda ndihmë për Ukrainën, e cila është pushtuar nga Rusia, duke hapur kështu rrugën për dërgesat e reja të armëve. Projektligji parashikon ndihma në vlerë prej gati 61 miliardë dollarësh për Kievin.
