Putini pritet të bëjë betimin në një ceremoni në Kremlin në Moskë, me pjesëmarrjen e politikanëve të lartë rusë dhe të ftuar të tjerë të rangut të lartë. 71-vjeçari ka dominuar politikën ruse për 24 vitet e fundit dhe ka kërkuar të rindërtojë fuqinë dhe dominimin rus mbi vendet fqinje. Forcat ruse aktualisht po zhvillojnë një pushtim të plotë të Ukrainës, të cilin Putin e urdhëroi në shkurt 2022. Ai mori 87% të votave në zgjedhjet e marsit, nën hijen e akuzave për mashtrim, dhe asnjë kandidat i vërtetë i opozitës nuk u lejua të konkurronte kundër tij. Për të mbetur në pushtet, Putini e rishkroi Kushtetutën ruse disa vite më parë. Pas mandatit të tij aktual, i cili përfundon në vitin 2030, Putini do të lejohet të kandidojë përsëri për një mandat tjetër deri në vitin 2036, kur ai të jetë 83 vjeç. Tradicionalisht në Rusi, qeveria ekzistuese jep dorëheqjen pas inaugurimit presidencial për të lejuar kreun e shtetit të formojë një kabinet të ri. Sipas informacioneve nga parlamenti rus, Duma, ligjvënësit mund të miratojnë emërimet e reja në ministri deri më 15 maj
