Sipas kryeministrit polak Donald Tusk, pushtimi rus i Ukrainës më shumë se dy vjet më parë paralajmëron për fillimin e një epoke të re të luftës në Evropë. “E di që tingëllon shkatërruese, veçanërisht për brezin e ri, por ne duhet të mësohemi me faktin se ka filluar një epokë e re: epoka e paraluftës. Nuk po e ekzagjeroj; kjo po bëhet më e qartë çdo ditë”, tha ai për gazetën gjermane “Die Welt”. “Unë nuk dua të tremb askënd, por lufta nuk është më një koncept nga e kaluara.
Është e vërtetë dhe filloi më shumë se dy vjet më parë”, shtoi ai. “Gjëja më shqetësuese për momentin është se çdo skenar është i mundur”, tha Tusk. “Ne nuk kemi parë një situatë të tillë që nga viti 1945. Në atë vit, Lufta e Dytë Botërore mori fund me dorëzimin e Gjermanisë së Hitlerit”, tha ai. “Tani vihet re një revolucion në mentalitetin evropian. Dikur askush nuk e vinte në dyshim nevojën për mbrojtje të përbashkët:, tha Tusk. “Hidhini një sy Gjermanisë, ku ka ndodhur një kthesë e madhe.
Sot, CDU dhe SPD po konkurrojnë për të parë se cili prej tyre është më pro-ukrainas”, tha Tusk. Duke pasur parasysh instrumentalizimin e migrantëve nga Rusia, ai bëri thirrje për mbrojtje më të qëndrueshme të kufijve të jashtëm të BE-së. “Bashkimi Evropian në tërësi, si një organizatë e fuqishme, duhet të jetë i përgatitur mendërisht për të luftuar për sigurinë e kufijve dhe territorit tonë”, tha ai
