Kryeministri izraelit, Benjamin Netanyahu arsyetoi anulimin e vizitës së një delegacioni të rangut të lartë izraelit në SHBA duke thënë se qëllimi ishte t’i dërgohej një mesazh Hamasit. Zyra e Netanyahut deklaroi se ”organizata militante palestineze ishte e bindur se presioni ndërkombëtar pas rezolutës së fundit të Këshillit të Sigurimit të OKB-së do të pengonte Izraelin të lironte pengjet dhe të shkatërronte Hamasin në Rripin e Gazës”. Netanyahu tha se donte t’u bënte të ditur islamikëve se nuk mund të mbështeten në idenë se ky presion do të kishte ndonjë efekt mbi Izraelin.
Të hënën, në një rezolutë të detyrueshme sipas ligjit ndërkombëtar, Këshilli i Sigurimit i OKB-së bëri thirrje për një “armëpushim të menjëhershëm” në Rripin e Gazës, për herë të parë që nga fillimi i luftës. Organi i OKB-së bëri thirrje gjithashtu për lirimin e menjëhershëm dhe pa kushte të të gjithë pengjeve të mbajtura nga Hamasi. Shtetet e Bashkuara të Amerikës hoqën dorë nga e drejta e vetos në votim dhe abstenuan. Netanyahu u përgjigj menjëherë duke anuluar vizitën e delegacionit izraelit në Uashington
