Shkencëtarët thonë se kanë eliminuar me sukses HIV-in nga qelizat e infektuara, duke përdorur teknologjinë e modifikimit të gjeneve Crispr. Duke punuar si gërshërë, por në nivel molekular, pret ADN-në në mënyrë që pjesët “e këqija” të mund të hiqen ose çaktivizohen.
Shpresa është që përfundimisht të jemi në gjendje të çlirojmë trupin tërësisht nga virusi, megjithëse nevojitet shumë më tepër punë për të kontrolluar se ai do të jetë i sigurt dhe efektiv. Deri më tani ilaçet ekzistuese të HIV-it mund ta ndalojnë virusin, por jo ta eliminojnë atë.
Ekipi i Universitetit të Amsterdamit, duke paraqitur një përmbledhje të gjetjeve të tyre të hershme në një konferencë mjekësore këtë javë , theksoi se puna e tyre mbetet thjesht “provë e konceptit” dhe nuk do të ketë një kurë për HIV-in së shpejti.
Shkencëtarë të tjerë po përpiqen gjithashtu të përdorin Crispr kundër HIV dhe Excision BioTherapeutics thotë se pas 48 javësh, tre vullnetarë me HIV nuk kanë efekte anësore serioze. HIV infekton dhe sulmon qelizat e sistemit imunitar, duke përdorur makinerinë e tyre për të bërë kopje të vetvetes.
Edhe me trajtim efektiv, disa kalojnë në një gjendje pushimi ose latente kështu që ato ende përmbajnë ADN-në, ose materialin gjenetik, të HIV-it, edhe nëse nuk prodhojnë në mënyrë aktive virusin e ri.
Shumica e njerëzve me HIV kanë nevojë për terapi antiretrovirale gjatë gjithë jetës. Nëse ndalojnë marrjen e këtyre barnave, virusi i fjetur mund të rizgjohet dhe të shkaktojë sërish probleme.
Disa prej tyre janë “shëruar”, pasi terapia agresive e kancerit fshiu disa nga qelizat e tyre të infektuara, por kjo nuk do të rekomandohej kurrë thjesht për trajtimin e HIV-it. RTSH
