Një linjë e energjisë elektrike për centralin bërthamor të Zaporizhias të pushtuar nga Rusia në Ukrainë u ndërpre dje në mbrëmje pas një sulmi me raketa. Furnizimi me energji i centralit garantohej nga një linjë zëvendësuese dhe nuk kishte asnjë rrezik për sigurinë e centralit bërthamor.
Presidenti ukrainas, Volodymyr Zelensky tha se Rusia kishte lëshuar më shumë se 60 dronë dhe gati 90 raketa gjatë natës. “Bota i sheh objektivat e terroristëve rusë sa më qartë që të jetë e mundur: centralet dhe linjat e furnizimit me energji, digën hidroelektrike, ndërtesat e zakonshme të banimit… Rusia është në luftë me jetën e përditshme të njerëzve”, shkroi Zelensky në X, dikur Twitter.
