Presidenti turk Recep Tayyip Erdogan tha sot se Ankaraja mbështet fuqishëm grupin militant palestinez Hamas, sipas AFP – Agence France Presse. “Askush nuk mund të na bëjë të kualifikojmë Hamasin si një organizatë terroriste”, tha ai gjatë një fjalimi në Stamboll. “Turqia është një vend që flet hapur me udhëheqësit e Hamasit dhe i mbështet ata me vendosmëri’, shtoi Erdogan. Erdogan ka qenë një nga kritikët më të ashpër të Izraelit që nga fillimi i luftës në Gaza, e cila filloi pas një sulmi të 7 tetorit nga Hamasi në Izrael që shkaktoi vdekjen e të paktën 1 160 personave, sipas një raporti zyrtar izraelit. Izraeli është përgjigjur me një ofensivë të pamëshirshme tokësore dhe ajrore. Ministria e Shëndetësisë në Gazën e drejtuar nga Hamasi tha se janë vrarë të paktën 30 878 persona në enklavën e rrethuar palestineze, kryesisht gra dhe fëmijë. Erdogan e ka quajtur Izraelin një “shtet terrorist” dhe e ka akuzuar atë për kryerjen e një “gjenocidi” në Gaza.
