Kina ka vendosur një objektiv ambicioz rritjeje prej rreth 5% këtë vit, pavarësisht se ekonomia e dytë më e madhe në botë po lufton me ngadalësimin e kërkesës globale për eksportet e saj, shpenzimet e dobëta të konsumatorëve në vend dhe një krizë në sektorin e pronave. Kryeministri Li Qiang e njoftoi këtë objektiv përpara 3 000 delegatëve, në fillimin e Kongresit Kombëtar të Popullit. “Nuk do të jetë e lehtë të arrihen objektivat e këtij viti”, deklaroi Li. ”Rritja prej 5% është e arritshme nëse të gjitha pjesët e vendit bashkohen së bashku dhe njerëzit punojnë shumë”, theksoi ai. Kjo përputhet me objektivin që u vendos vitin e kaluar dhe që në fund u tejkalua paksa.
Sipas shifrave zyrtare nga Pekini, ekonomia përfundimisht u rrit me 5,2% në 2023. Ndërsa kritikët dyshojnë për besueshmërinë e plotë të të dhënave ekonomike kineze, objektivi i rritjes konsiderohet megjithatë si një tregues i rëndësishëm i kursit të politikës ekonomike të qeverisë. Ekonomia e Kinës po goditet nga forcat brenda dhe jashtë vendit, ndërsa stoqet kanë qenë në rënie. Për më tepër, analistët thonë se rritja prej 5% ishte më e lehtë për t’u realizuar vitin e kaluar për shkak të efekteve të rimëkëmbjes nga heqja e kontrolleve të Covid-19.
Sipas projektbuxhetit të qeverisë, i cili u publikua sot, deficiti pritet të jetë 3% e Prodhimit të Brendshëm Bruto (PBB). Objektivi për vitin 2022 ishte gjithashtu 3%, por kjo më vonë u rrit në 3,8%. Li gjithashtu njoftoi se më shumë se 12 milionë vende të reja pune do të krijohen në qytete këtë vit. Ashtu si në vitin 2023, qeveria synon gjithashtu një normë papunësie prej rreth 5,5%. Inflacioni parashikohet të jetë rreth 3%. Kongresi Kombëtar Popullor është planifikuar të mbyllet të hënën e ardhshme, më 11 mars.
