Afganistani nisi sot një fushatë të re vaksinimi ndaj poliomielitit që synon mbrojtjen e rreth 7,6 milionë fëmijëve nën moshën pesë vjeç, njoftoi Ministria e Shëndetësisë. “Fushata do të zgjasë katër ditë në 21 nga 34 provincat e vendit”, tha ministria. Zëdhënësi i Ministrisë së Shëndetësisë, Dr. Sharafat Zaman u kërkoi dijetarëve fetarë dhe më të vjetërve vendas që të bashkëpunojnë me ofruesit e vaksinave për të luftuar kundër poliomielitit, një sëmundje infektive që mund të shkaktojë paralizë dhe të çojë në vdekje. “Numri i rasteve pozitive të poliomielitit është ulur këtë vit”, tha zëdhënësi.
Vitin e kaluar janë zbuluar të paktën gjashtë raste të llojit të egër të poliovirusit në shkallë vendi. Në dhjetor, Organizata Botërore e Shëndetësisë (OBSH) paralajmëroi se riatdhesimi i migrantëve nga Pakistani fqinj kishte rritur rrezikun e përhapjes së virusit. Që atëherë, vendi ka kryer të paktën dy raunde vaksinash mbarëkombëtare. Fushatat e vaksinimit në Afganistan dhe Pakistan shpesh hasin vështirësi për shkak të teorive konspirative se vaksinimi i poliomielitit shkakton infertilitet ose se njerëzit që bëjnë vaksinat janë spiunë. Përpara se të merrnin pushtetin e të gjithë vendit në gusht 2021, talebanët kishin ndaluar vaksinimet në zonat që ata kontrollonin. Por, Kombet e Bashkuara negociuan me sukses me ta për të rifilluar programin e vaksinimit në të gjithë vendin pas kthimit të tyre në pushtet
