Dhjetëra mijëra hungarezë kanë protestuar pas një faljeje presidenciale, në një rast të abuzimit seksual të fëmijëve që ka tronditur kombin, sipas BBC. Demonstruesit mbushën Sheshin historik të Heronjve në Budapest në shenjë solidariteti me viktimat e abuzimit. Presidentja Katalin Novak dhe dy figura të larta në partinë qeverisëse ”Fidesz” të kryeministrit Viktor Orban dhanë dorëheqjen javën e kaluar për faljen e diskutueshme. Edhe një peshkop që këshilloi kryeministrin e krahut të djathtë tani është larguar gjithashtu. Zoltan Balog pranoi se kishte mbështetur faljen e zonjës Novak për zëvendësdrejtorin e një shtëpie fëmijësh, i cili është dënuar për fshehje të abuzimit seksual nga shefi i tij.
”Skandali është bërë kërcënimi më i madh për sundimin konservator të Orban, që kur ai u kthye në pushtet në vitin 2010”, thotë Nick Thorpe i BBC-së në Budapest. Qeveria e Orban i ka bërë vlerat familjare një temë thelbësore të politikave të tij. Katalin Novak dha dorëheqjen javën e kaluar, duke kërkuar falje për “një gabim” në dhënien e faljes. Polemika që çoi në dorëheqjet erdhi pasi emrat e 25 personave të falur nga zonja Novak në prill të vitit të kaluar, si pjesë e një vizite në Hungari nga papa Françesku, u bënë publike nga mediat hungareze. Në listën e të dënuarve ishte zëvendësdrejtori i një shtëpie fëmijësh pranë Budapestit, i cili ishte burgosur për tre vjet pasi kishte detyruar fëmijët të tërhiqnin pretendimet për abuzim ndaj drejtorit të shtëpisë. Vetë drejtori ishte dënuar me tetë vjet burg për abuzimin e fëmijëve në institucionin e drejtuar nga qeveria
