Njëzet e shtatë vendet anëtare të Bashkimit Evropian janë në favor të zgjidhjes me dy shtete për konfliktin izraelito-palestinez, ky është mesazhi i cili do të bëhet i ditur të hënën e ardhshme, në kuadër të bisedimeve me ministrin e Jashtëm, Israel Katz. Lajmi u njoftua nga një burim i lartë diplomatik evropian duke komentuar fjalët e kryeministrit Benjamin Netanyahu, i cili përjashtoi zgjidhjen me dy shtete. ”Nuk është çudi, ai nuk ka qenë asnjëherë në favor”, tha burimi, duke shtuar se brenda qeverisë izraelite ka qëndrime të ndryshme. Për sa i përket rezultateve të mundshme praktike nga Këshilli, nuk pritet ndonjë deklaratë e përbashkët. Pavarësisht numrit në rritje të vendeve në favor të kërkesës për një armëpushim të menjëhershëm, Berlini është ende i mendimit se Izraeli ka të drejtën e vetëmbrojtjes, duke bllokuar efektivisht progresin në këtë çështje. “BE-ja është e ndarë në përgjigjen që duhet t’i jepet krizës së Gazës dhe është një ndarje që duhet zgjidhur ‘brenda familjes’”, shton burimi. “Ne nuk jemi SHBA-ja që mund të dërgojmë dy aeroplanmbajtëse në zonë”, sipas burimit. Plani i Paqes prej 10 pikash i hartuar nga përfaqësuesi i lartë, Josep Borrell do të diskutohet gjithashtu në takimin e Këshillit. ”Duhet më shumë punë, në diskutime duhet të përfshihen edhe SHBA-ja dhe Izraeli, përndryshe nuk do ishte e dobishme asgjë”, theksoi burimi.
