Prodhuesit evropianë të veshjeve, kozmetikës dhe lodrave kanë pësuar humbje vjetore në shitje prej rreth 16 miliardë euro (17,5 miliardë dollarë) si rezultat i produkteve të falsifikuara, sipas një studimi të fundit. Rreth 200 000 vende pune janë humbur gjithashtu si rezultat i këtij mashtrimi, tregon hulumtimi i ri i Agjencisë së Pronësisë Intelektuale të BE-së (EUIPO). “Mallrat e falsifikuara shkaktojnë kosto reale për konsumatorët, për markat dhe për ekonomitë tona. Ky studim i fundit tregon kostot reale përsa i përket shitjeve të humbura dhe vendeve të punës në BE”, tha drejtori ekzekutiv i EUIPO, João Negrão. Industria e madhe gjermane e lodrave është ndër sektorët më të goditur në BE, duke llogaritur një të tretën e humbjeve vjetore të shitjeve (334 milionë euro) për shkak të mallrave të falsifikuara. Vendi më i prekur nga falsifikimi në sektorin e veshjeve është Qiproja, ndërsa në sektorin e kozmetikës është Franca. Industria e veshjeve humb pothuajse 12 miliardë euro të ardhura çdo vit ose 5,2% të xhiros totale të saj. Sektori evropian i kozmetikës dhe industria e lodrave raportuan gjithashtu shitje dukshëm më të ulëta për shkak të produkteve të markave të falsifikuara. Humbjet nga xhirot arritën në 3 miliardë euro për kozmetikën (4,8%) dhe 1 miliardë euro për lodrat (8,7%). Falsifikimi ka gjithashtu një ndikim negativ në tregun e punës. Sipas studimit të EUIPO, i cili bazohet në të dhënat nga viti 2018 deri në vitin 2021, 160 mijë vende pune janë humbur në sektorin e veshjeve, 32 mijë në sektorin e kozmetikës dhe 3600 në sektorin e lodrave. Në të njëjtën kohë, mallrat e markave të falsifikuara shpesh paraqesin probleme serioze për shëndetin dhe sigurinë për konsumatorët. Kjo vlen veçanërisht për kozmetikën dhe lodrat e falsifikuara. Sipas EUIPO, 15% e mallrave të sekuestruara në kufijtë e jashtëm të BE-së në vitin 2022 ishin produkte të falsifikuara potencialisht të rrezikshme.
