Operatori i Shpërndarjes së Energjisë Elektike (OSHEE) ka nisur reformën për heqjen e disa dokumenteve të rëndësishme që e çonin abonentin drejt palëve të treta. Iniciativa për derregullimin është bërë publike nga Administratori i Përgjithshëm i grupit OSHEE, Enea Karakaçi. Sipas tij, kjo lëvizje lehtësuese ruan standardin dhe sigurinë. Por nga ana tjetër, theksoi ai, është e rëndësishme të ofrohet shërbimi në kohë sa më të shkurtër për qytetarët. OSHEE vijoi uljen e humbjeve në rrjet dhe rritjen e arkëtimeve, duke ruajtur performancën pozitive, pavarësisht vështirësive dhe problematikave të krijuara nga kriza energjetike me të cilën u përball e gjithë Europa. Në fund të vitit 2023 niveli i humbjeve në rrjet ra në 18.93 % nga 19.72 % që ishte në vitin 2022, ndërsa norma e arkëtimit shkoi në 99.3 % në 2023-shin nga 98 % që ishte një vit më parë.
