Të paktën 110 raketa u lëshuan mbi Ukrainë duke shkaktuar vdekje dhe plagosje, në sulmin masiv rus të natës së djeshme, deklaroi sot presidenti ukrainas Volodymyr Zelensky. ”Rusia ka përdorur pothuajse çdo lloj arme në arsenalin e saj ”Kindzhals”, S-300, raketa dhe dronë. Ne do t’i përgjigjemi sulmeve terroriste. Dhe ne do të vazhdojmë të luftojmë për sigurinë e të gjithë vendit tonë, çdo qyteti dhe çdo qytetari”, shton ai. “Shumica e raketave u rrëzuan. Sulmet ruse kishin në shënjestër një maternitet, shkolla, një qendër tregtare, ndërtesa banimi shumëkatëshe dhe shtëpi private në Kiev, Lviv, Odessa, Dnipro, Kharkiv, Zaporizhzhia dhe qytete të tjera”, shtoi Zelensky. “Të gjitha shërbimet e urgjencës po punojnë gjatë gjithë kohës për të ofruar ndihmën e nevojshme. Ngushëllimet e mia për ata që humbën të dashurit e tyre. Uroj shërim të shpejtë për të lënduarit”, përfundoi ai.
