Pas ndryshimeve thelbësore në një projektkompromis për një rezolutë për Gazën në Këshillin e Sigurimit të OKB-së, një votim u shty sërish dje në mbrëmje vonë. U tha se disa vende duhej të konsultoheshin me qeveritë e tyre. Në bisedimet me dyer të mbyllura, disa anëtarë të këshillit kishin shprehur pakënaqësi me tekstin e zbehtë për rritjen e ndihmës humanitare për Rripin e Gazës. Teksti është rezultat i negociatave intensive midis SHBA-së, Emirateve të Bashkuara Arabe dhe Egjiptit. Në ditët e fundit, negociatorët kishin bërë një rrugë të gjatë drejt aleatit të Izraelit, SHBA-së, në mënyrë që të parandalonin një veto dhe si rrjedhim një dështim të rezolutës. Teksti i ri i bën thirrje Izraelit që të lejojë menjëherë aksesin e sigurt dhe të papenguar humanitar në Rripin e Gazës. ”Duhet të krijohen edhe kushtet për një ndërprerje të qëndrueshme të dhunës”, parashikon drafti. Anëtarët e organit më të fuqishëm të OKB-së arritën një kompromis mbi çështjen e diskutueshme se si do të kontrollohen mallrat. Pasazhe të tjera u fshinë nën presionin e SHBA-së, përfshirë një paragraf që dënon të gjitha shkeljet e ligjit ndërkombëtar humanitar dhe të gjitha sulmet pa dallim ndaj civilëve dhe objekteve civile. Një pezullim i menjëhershëm i dhunës i kërkuar më parë për të lejuar dërgimin e ndihmave mungon gjithashtu në draftin aktual. Votimi u shty disa herë për shkak të kërcënimit të vetos së SHBA. Megjithatë, pas lëshimeve të mëdha të bëra nga negociatorët, ambasadorja amerikane në OKB Linda Thomas-Greenfield tha se nuk do të vërë veton ndaj votimit. Miratimi kërkon të paktën nëntë vota pro nga 15 anëtarët. Vendet me fuqinë e vetos SHBA, Kina, Rusia, Britania e Madhe dhe Franca duhet të votojnë të gjitha pro që teksti të kalojë.
