Ministri për Evropën dhe Punët e Jashtme, Igli Hasani, do të marrë pjesë në takimin Ministerial të Komisionit të Partneritetit të Kartës SHBA-Adriatike (A5), që mbahet në Shkup të Maqedonisë së Veriut. Ministri Hasani dhe homologu Osmani do të zhvillojnë një konferencë të përbashkët për shtyp, për të bërë kalimin simbolik të kryesisë së A-5 nga pala maqedonase tek kryesia shqiptare për vitin 2024. Karta SHBA-Adriatike (US-Adriatic Charter) është një nismë politike sigurie me karakter rajonal, e dakordësuar paraprakisht në Samitin e NATO-s në Pragë (nëntor 2002), mes Presidentëve të Shqipërisë, Kroacisë, Maqedonisë dhe SHBA-ve. Ajo u konceptua si kundërpeshë inkurajuese nga administrata amerikane për tre vendet e Ballkanit aspirante në NATO, pas mos ftuarjes së tyre në Samitin e Pragës për anëtarësim në NATO.
