Komisioni Evropian ka propozuar paketën e 12-të të sanksioneve të BE-së ndaj Rusisë lidhur me pushtimin e saj në shkallë të plotë të Ukrainës, tha sot Shërbimi Evropian i Veprimit të Jashtëm. Propozimi përfshin sanksionimin e më shumë se 120 individëve dhe subjekteve të tjera për rolin e tyre në minimin e sovranitetit dhe integritetit territorial të Ukrainës. Ai përfshin gjithashtu ndalime të reja të importit dhe eksportit, si dhe masa për të shtrënguar kufirin e çmimit të naftës dhe për të kundërshtuar anashkalimin e sanksioneve të BE-së. Propozimet për listimet përfshijnë aktorë nga ushtria ruse, sektorët e mbrojtjes dhe IT, si dhe operatorë të tjerë kryesorë ekonomikë. Përfaqësuesit e shteteve të Bashkimit Evropian janë duke vlerësuar paketën, e cila duhet të zbatohet deri në fund të vitit. Presidentja e Komisionit Evropian, Ursula von der Leyen njoftoi se do të kishte një raund të ri masash ndëshkuese ekonomike gjatë vizitës në Kiev, në fillim të muajit. Vendet e Bashkimit Evropian do të negociojnë detajet e paketës së fundit nga komisioni. BE-ja duhet të miratojë unanimisht sanksionet e reja përpara se të hyjnë në fuqi. Një propozim për të kufizuar tregtinë e diamanteve nga Rusia është përfshirë gjithashtu në paketën e sanksioneve.
