Austin: Putini do të ketë sukses në Ukrainë nëse Uashingtoni ndërpret ndihmën

Sekretari amerikan i Mbrojtjes, Lloyd Austin, ka frikë se Rusia do të jetë e suksesshme në luftën e saj kundër Ukrainës, nëse SHBA-ja nuk vazhdon mbështetjen e saj për vendin e pushtuar. Në një seancë dëgjimore të Senatit të SHBA-së në Uashington, Austin u pyet se sa kohë kishte Ukraina përpara se presidenti rus Vladimir Putin të fitonte luftën, nëse nuk do të kishte ndihmë të mëtejshme ushtarake amerikane për Ukrainën. Austin tha se ishte e vështirë të jepej një kornizë e saktë kohore. “Unë mund të garantoj se pa mbështetjen tonë Putin do të jetë i suksesshëm”, tha ai. “Nëse ne nuk ofrojmë ndihmë, Putini vetëm do të bëhet më i fortë dhe ai do të jetë i suksesshëm duke bërë atë që dëshiron të bëjë”, tha Austin. Austin dhe sekretari amerikan i shtetit Antony Blinken ishin në seancën dëgjimore për t’iu përgjigjur pyetjeve në lidhje me paketën e ndihmës prej rreth 105 miliardë dollarë që presidenti i SHBA-së, Joe Biden ka kërkuar nga Kongresi, e cila përfshin mbështetjen për Izraelin dhe Ukrainën.