Netanyahu: Armëpushimi do të ishte dorëzim ndaj Hamasit

Kryeministri izraelit, Benjamin Netanyahu ka refuzuar me vendosmëri një armëpushim me Hamasin. “Ashtu si Shtetet e Bashkuara të Amerikës nuk do të pajtoheshin me një armëpushim pas bombardimeve të Pearl Harbor ose pas sulmit terrorist të 11 shtatorit, as Izraeli nuk do të pajtohet me një ndërprerje të armiqësive me Hamasin pas sulmeve të tmerrshme të 7 tetorit”, tha ai para gazetarëve. “Thirrjet për një armëpushim janë thirrje për Izraelin që t’i dorëzohet Hamasit, t’i dorëzohet terrorizmit, t’i dorëzohet barbarizmit. Kjo nuk do të ndodhë… Bibla thotë se ka një kohë për paqe dhe një kohë për luftë. Kjo është një kohë për luftë, një luftë për një të ardhme të përbashkët”, tha Netanyahu. Ai u bëri thirrje të gjitha kombeve të qytetëruara që të qëndrojnë me Izraelin në kërkimin e lirimit të menjëhershëm dhe të pakushtëzuar të pengjeve dhe në tërheqjen e një kufiri midis forcave të qytetërimit dhe forcave barbare. ”Është koha që të gjithë të vendosin se ku do të qëndrojnë”, tha Netanyahu