Nobelistët kërkojnë siguri për të gjithë fëmijët viktima të luftës, ata të Izraelit dhe ata të Gazës.
Në një letër të hapur të nënshkruar nga 29 fitues të çmimit Nobel, ata ftojnë të gjithë ata që janë “për një paqe të qëndrueshme për të gjithë fëmijët që jetojnë në Izrael, Palestinë dhe gjetkë” që të ndezin qirinj.
“Sonte, në kulmin e errësirës, ne do të ndezim tre qirinj: një për të gjithë fëmijët e vrarë dhe të rrëmbyer në Izrael, dhe një për të gjithë fëmijët e vrarë dhe të gjymtuar në bombardimet dhe luftimet në Gaza, dhe një për njerëzimin dhe shpresën”, thuhet në mesazhin e tyre.
Nga 29 nënshkruesit e letrës, 11 janë fitues të çmimit Nobel për Paqe, si aktivistja ukrainase Oleksandra Matviichuk e dhënë në 2022 dhe guatemalezja Rigoberta Menchù Tum si dhe shumë fitues të çmimit Nobel për Fizikë, Mjekësi dhe Kimi.
“Ne jemi thellësisht të tronditur nga fëmijët e vrarë gjatë masakrës së kryer nga Hamasi dhe nga fëmijët e vrarë deri më tani në bombardimet e përhapura pasuese të Gazës nga Izraeli”, thuhet në letër.
“Ekziston një rrezik serioz që në javët e ardhshme mund të ketë një humbje edhe më të madhe të jetës dhe që edhe më shumë fëmijë të vdesin në vende të tjera. Fëmijët palestinezë janë fëmijët tanë. Fëmijët izraelitë janë fëmijët tanë”, shkruajnë sërish nobelistët.
“I bëjmë thirrje të gjithëve të kujtojnë se fëmijët nuk kanë shkaktuar asnjë luftë dhe nuk janë përgjegjës për situatën. Të gjithë fëmijët e rrëmbyer duhet të lirohen urgjentisht dhe të gjithë fëmijëve duhet t’u ofrohet një kalim i sigurt nga konflikti. Fëmijët nuk mund të detyrohen të vuajnë mungesën e ujit, ushqimit, kujdesit dhe strehimit. Fëmijët dhe njerëzit në nevojë duhet të marrin ndihma humanitare menjëherë”, përfundon mesazhi i nobelistëve
