IZRAEL-Marrëveshje për formimin e një qeverie emergjente

Kryeministri izraelit, Benjamin Netanyahu ka arritur një marrëveshje me politikanin kryesor të opozitës Benny Gantz për të formuar një qeveri emergjente, thanë ministrat e partisë në pushtet “Likud”. Izraeli ka nisur sulme masive ajrore në Rripin e Gazës palestineze në reagim ndaj militantëve të Hamasit që sulmuan shtetin hebre të shtunën. Mbi 1 000 persona kanë vdekur nga secila anë. Sipas marrëveshjes, Netanyahu, ministri i Mbrojtjes Yoav Gallant dhe ish-ministri i Mbrojtjes Gantz i koalicionit të Unitetit Kombëtar do të formojnë një kabinet lufte. “Ish-shefi i shtabit të përgjithshëm Gadi Eizenkot dhe zyrtari i lartë i “Likud”, Ron Dermer do të shërbejnë gjithashtu si vëzhgues”, thanë ministrat. Raportet thonë se Gantz pritet gjithashtu të sigurojë pesë ministra për një kabinet sigurie. Netanyahu u ofroi të shtunën liderëve të opozitës Yair Lapid dhe Gantz role në një qeveri emergjente. Ishte e paqartë nëse Lapid do të luajë gjithashtu një rol në qeverinë e emergjencës. Ekspertët besojnë se do të nevojitet një koalicion i gjerë për të nxitur vendime të gjera ushtarake dhe politike në ditët në vijim.