Pozicionim dhe patrullim i Policisë së Kosovës në hyrje të fshatit Banjskë

Njësitë elitare të Policisë së Kosovës, vazhdojnë të qëndrojnë të pozicionuar në hyrje të fshatit Banjskë të Zveçanit. Ndërkohë në brendësi të fshatit, ku nuk lejohen mediat, policia është duke patrulluar. Në rrugën që të dërgon për fshatin ku dje në një sulm terroristë ishin sulmuar policët nga persona të armatosur dhe të uniformuar, policia po legjitimon veturat dhe personat që lëvizin drejt fshatit. Mëngjesin e së dielës së 24 shatorit në një sulm terroristë është vrarë rreshteri i Policisë së Kosovës, Afrim Bunjaku, si dhe janë plagosur dy të tjerë. Pas këtij rasti policia ka ndërmarrë një operacion ku si rezultat kanë mbetur të vrarë 3 nga sulmuesit dy të tjerë janë plagosur. Në afërsi janë arrestuar edhe 4 persona të dyshimtë të cilëve i janë gjetur disa radiolidhje. Të arrestuarve u është caktuar masa e ndalimit policorë prej 48 orësh.