Presidentja e Kosovës, Vjosa Osmani, ka reaguar në lidhje me ngjarjen e regjistruar në veri të vendit, ku persona të armatosur kanë qëlluar në drejtim të Policisë së Kosovës duke vrarë një efektiv dhe duke plagosur një tjetër. Osmani e konsideron ngjarjen si agresion të Serbisë, teksa bën thirrje për mbështetje nga aleatët. “Sulmet e organizuara kundër forcave të rendit të Republikës së Kosovës janë sulme kundër sovranitetit të Republikës së Kosovës. Përveç dënimit të ashpër të këtij agresioni të hapur të Serbisë ndaj Kosovës, pres që aleatët tanë do ta mbështesin Kosovën në përpjekjen e saj për vendosjen e rendit dhe ligjit si dhe ruajtjen e sovranitetit në çdo pjesë të Republikës së Kosovës”, shkruan Osmani. Presidentja e Kosovës shprehet se ngjarja është e “orkestruar dhe ekzekutuar nga bandat kriminale serbe” që po synojnë, sipas sak, të destabilizojnë Kosovën dhe rajonin. “Vrasja e një polici dhe plagosja e një polici tjetër në veriun e Kosovës, e planifikuar, orkestruar dhe ekzekutuar nga bandat kriminale serbe, është sulm ndaj rendit dhe ligjit në veriun e vendit, është sulm ndaj Kosovës. Këto sulme dëshmojnë edhe njëherë fuqinë destabilizuese të bandave kriminale, të organizuara nga Serbia, të cilat prej shumë kohësh, siç është dëshmuar edhe me sulmet ndaj pjesëtarëve të KFOR-it, gazetarëve e qytetarëve, po synojnë të destabilizojnë Kosovën dhe rajonin”, thekson Presidentja. Sipas Osmanit, Serbia po sfidon “hapur” integritetin territorial të Kosovës. “Ftoj të gjithë qytetarët, institucionet dhe subjektet politike që të qëndrojnë të bashkuar në këtë kohë kur nga Serbia po sfidohet hapur integriteti territorial, siguria dhe sovraniteti i Republikës sonë. Si Presidente e Republikës kam besimin e plotë në djemtë dhe vajzat tona nga Policia e Kosovës”, shprehet ajo.
- Advertisment -