BE, hetim për ndihmën shtetërore kineze tek makinat elektrike

Ministrat e Financave të Bashkimit Evropian kanë biseduar në favor të planeve të BE-së për një hetim kundër subvencioneve për automjetet elektrike nga Kina. Duke mbërritur në një takim me homologët e tij të BE-së në Santiago de Compostela, Spanjë, ministri gjerman i financave Christian Lindner përshëndeti njoftimin e bërë nga Komisioni Evropian në fillim të kësaj jave. “Është e drejtë që të vendoset barazia. Gjithçka duhet të ndjekë rregullat e Organizatës Botërore të Tregtisë. Dhe nëse ka shqetësime, ndjekja e tyre mund të mirëpritet”, shtoi ai. Ministri francez i Financave Bruno Le Maire foli gjithashtu për “vendimin e duhur” për të nisur hetimin. “Ne duam të kemi një partneritet të mirë me Kinën, por partneriteti duhet të bazohet në rregulla të drejta dhe një fushë loje të barabartë,” tha ai.