Drejtoria e Përgjithshme e Arkivave sjell detaje mbi monumentet e vjetra arkitektonike të qytetit të Tiranës. Nga monumentet e rralla arkitektonike me të cilët u pajis Tirana në gjysmën e parë të shek. të XVIII, qenë urat. “Ura e Tabakëve”, e cila ruhet edhe sot si monument kulture, u ndërtua nga esnafi i Tabakëve në fillimin e rrugës së Shën Gjergjit (Ali Demi) dhe deri në fillimin e Luftës së Dytë Botërore përshkohej nga përroi i Lanës. Një tjetër monument i rëndësishëm ishte “Ura e Terzive”, me 5 harqe, e cila u ndërtua në fillim të rrugës së Elbasanit, nga esnafi i Terzive. Në vitin 1930 arkitektura e urës u prish duke u zëvendësuar me një urë të ngushtë që qëndroi e tillë deri në vitin 1990, pasi iu nënshtrua sërish ndryshimeve ndërtimore. Të dyja urat e shekullit të XVIII lidhën funksionalisht qendrën e Tiranës me lagjet e “Tabakëve” dhe “Terzive” dhe zbukuruan arkitekturën urbane të Tiranës.
- Advertisment -