Shiu i rrëmbyeshëm dhe erërat e shkaktuara nga cikloni kanë lënë të paktën 21 persona të vdekur në Brazilin jugor, ndërsa priten të tjera përmbytje.
Guvernatori i Rio Grande do Sul ka thënë se kjo është fatkeqësia më e keqe e motit në shtet.
Mijëra njerëz janë detyruar të largohen nga shtëpitë e tyre.
Në Mucum, një qytet me 5,000 banorë, qindra u desh të ngjiteshin në çatitë e tyre pasi 85% e qytetit u përmbyt.
Presidenti Luiz Inacio Lula da Silva tha se qeveria federale ishte e gatshme të ndihmonte.
Më shumë se 300 mm shi goditi shtetin në më pak se 24 orë, duke shkaktuar përmbytje dhe rrëshqitje dheu.
Për fat të keq ka ende njerëz të zhdukur mes frikës se numri i viktimave mund të rritet më tej.
Punonjësit e shpëtimit kanë përdorur helikopterë për të arritur në zonat e rrezikuara nga përmbytjet.
Shumë faktorë kontribuojnë në përmbytjet, por një atmosferë ngrohëse e shkaktuar nga ndryshimet klimatike i bën më të mundshme reshjet ekstreme.
Bota tashmë është ngrohur me rreth 1.2C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.
Në shkurt, të paktën 40 njerëz humbën jetën nga përmbytjet dhe rrëshqitjet e dheut në shtetin Sao Paulo të Brazilit. Ndërsa vitin e kaluar të paktën 100 njerëz vdiqën pasi shiu i rrëmbyeshëm shkaktoi rrëshqitje dheu pranë qytetit të Recife në veri-lindje të vendit.
