Një geko i çuditshëm me bisht gjetheje, i zbuluar më shumë se 20 vjet më parë në Madagaskar, tani është konfirmuar si një specie e panjohur më parë. Një ekip studiuesish i udhëhequr nga shkencëtari Frank Glaw, i Koleksionit Zoologjik Shtetëror i Mynihut publikoi zbulimin në revistën shkencore “Salamandra”. “Kur i zbuluam për herë të parë kafshët në vitin 2000, ne dyshuam se ato ishin një specie ende e panjohur”, tha Glaw në një deklaratë. “Por, përshkrimi i tyre shkencor ishte i vështirë. Na u deshën shumë vite për të mbledhur informacione të mjaftueshme për ta identifikuar atë si një specie e re”, tha ai. Sfida thuhet se ishte se gekoja e re, e quajtur Uroplatus garamaso, shumë e ngjashme me një specie tjetër, Uroplatus henkeli. “Ky është shpesh rasti me zvarranikët e Madagaskarit”, tha bashkëautori Jörn Köhler i “Hessisches Landesmuseum Darmstadt”, muzeut të madh multidisiplinar, në Darmstadt. “Ka shumë të ashtuquajtura specie të fshehta”, tha ai. “Por, u zbuluan dallime të rëndësishme. Në speciet e njohura më parë, maja e gjuhës është e zezë, ndërsa tek e reja është rozë. Përveç kësaj, specia e re është më e vogël me një gjatësi prej rreth 20 centimetra dhe ka një bisht më të ngushtë”, shtoi ai. Studiuesit mblodhën informacion gjithëpërfshirës mbi gjenetikën dhe shpërndarjen e kafshëve dhe gjithashtu ndërmorën disa ekspedita në veri të Madagaskarit.
