MEPJ: Qytetarët shqiptarë në Rusi të kontaktojnë ambasadën

Ministria për Europën dhe Punët e Jashtme i është drejtuar me një apel qytetarëve shqiptarë pas situatës së krijuar me grushtin e shtetit të grupit “Wagner” në Rusi. Ministria thekson se po ndjek zhvillimet aktuale në Federatën Ruse, ndërsa apelon qytetarët shqiptarë që të kontaktojnë ambasadën shqiptare në Moskë. Ministria për Europën dhe Punët e Jashtme, thekson se është duke ndjekur në vijimësi zhvillimet në Federatën Ruse dhe është në komunikim të vazhdueshëm me partnerët dhe aleatët tanë, mbi reagimet e mundshme. Në këtë kuadër, Ministria për Europën dhe Punët e Jashtme ka publikuar numrat e kontaktit dhe adresën e postës elektronike me të cilat shtetasit shqiptarë që do të udhëtojnë drejt Rusisë apo jetojnë në Rusi mund të kontaktojnë Ambasadën e Republikës së Shqipërisë në Moskë. “Këshilla udhëtimi për shtetasit e Republikës së Shqipërisë për situatën në Rusi”,- njoftimi i Ministrisë për Europën dhe Punët e Jashtme. “Ministria për Evropën dhe Punët e Jashtme – Republika e Shqipërisë po ndjek në vijimesi zhvillimet në Federatën Ruse dhe është në komunikim të vazhdueshëm me partnerët dhe aleatët tanë, mbi reagimet e mundshme.Të gjithë shtetasit e Republikës së Shqipërisë 🇦🇱 që aktualisht gjenden në Federatën Ruse mund të kontaktojnë Ambasadën e RSH-së në Moskë: në numër telefoni +7 495 982-38 52 05 (3); Celular: + 7 929 968 05 38; Ndërsa posta elektronike është embassy.moscoë@mfa.gov.al”, njofton Ministria për Europën dhe Punët e Jashtme. Po ashtu, MEPJ njofton se shtetasit shqiptarë mund të kontaktojnë edhe drejt për drejt Ministrinë. “Gjithashtu, të gjithë shtetasit e Republikës së Shqipërisë në Federatën Ruse mund të kontaktojnë drejtpërdrejt me Ministrinë për Evropën dhe Punët e Jashtme në adresën: [email protected]”, përfundon njoftimi. atsh