Greqia i kërkon Europolit ndihmë për hetimin e katastrofës

Autoritetet greke të zbatimit të ligjit i kanë kërkuar autoritetit policor evropian, Europol për mbështetje në hetimin e tyre për katastrofën e anijes me emigrantë në Mesdhe që besohet të ketë vrarë disa qindra njerëz, ndërsa kërkimi për të mbijetuarit po përfundon. Hetimi po fokusohet në nëntë të mbijetuar të cilët u arrestuan si kontrabandistë të dyshuar. Njëri prej tyre ndodhet ende në spital. Egjiptianët, të moshës 20 deri në 40 vjeç, akuzohen për trafikim njerëzor, vrasje nga pakujdesia dhe formim i një organizate kriminale. ”Ata dyshohet se i përkasin një rrjeti kontrabandistësh njerëzish që mund të kenë organizuar deri në 18 kalime të rrezikshme nga bregdeti libian në Itali gjatë muajve të fundit”, raportoi transmetuesi shtetëror grek ERT. Me ndihmën e Europolit, hetuesit grekë shpresojnë të përcaktojnë organizatorët pas operacionit të kontrabandës. Personat e arrestuar u identifikuan përmes deklaratave të të mbijetuarve të tjerë. Gazeta ”Kathimerini” raportoi se një nga të arrestuarit pranoi se merrte para për punën në bord dhe se të tjerët mohuan të gjitha akuzat. Të mbijetuarit thanë se kishin paguar 5 000 – 6000 euro për kokë për udhëtimin. Të hënën, kontrabandistët e dyshuar do të sillen para magjistratit hetues. Të mërkurën, një varkë peshkimi e mbipopulluar plotësisht me 500 deri në 700 emigrantë u fundos gjatë rrugës nga Afrika në Evropë. Gjithsej 104 persona u mundën të shpëtoheshin, ndërsa 78 u gjetën të vdekur. Vendi i aksidentit, rreth 90 kilometra në jugperëndim të gadishullit të Peloponezit, shtrihet pikërisht mbi thellësinë e Calypso, e cila me më shumë se 5 000 metra është pika më e thellë në Mesdhe. Është e mundur që varka e peshkimit të mos gjendet kurrë. Roja bregdetare vazhdonte të operonte në rajon edhe dje me një fregatë, tre varka patrullimi dhe një helikopter. Megjithatë, erërat e forta penguan punën e tyre. Shpresat për shpëtimin e të mbijetuarve të tjerë praktikisht nuk ekzistojnë.atsh