Raporti :Rriten vdekjet nga droga ilegale në Evropë

Vdekjet nga droga ilegale vazhdojnë të rriten vit pas viti në Evropë, sipas një raporti të publikuar sot. Qendra Evropiane e Monitorimit për Drogën dhe Varësinë nga Drogat (EMCDDA) tha në raportin e saj se ndikimi i përdorimit të drogave të paligjshme tani shihet pothuajse kudo në shoqëri. Shkalla e vdekshmërisë për shkak të mbidozave në Bashkimin Evropian, në vitin 2021 vlerësohet në 18,3 vdekje për milion popullsi të moshës 15 deri në 64 vjeç. Në vitin 2021, numri i vdekjeve të lidhura me drogën në Gjermani arriti në 1 826, krahasuar me vitet e mëparshme, ndërsa tani është regjistruar një numër rreth dy herë më i madh sesa 10 vjet më parë. Gjermania është e para në BE me numrin më të madh të vdekjeve nga droga, e ndjekur nga Spanja (774), Suedia (450) dhe Franca (417). “Për shkak të dallimeve metodologjike, numrat nga vendet e ndryshme duhet të interpretohen me kujdes”, tha EMCDDA. Megjithatë, është e padiskutueshme se trendi në Gjermani dhe në të gjithë Bashkimin Evropian është në rritje. Sipas raportit të agjencisë me qendër në Lisbonë, ka pasur gjithsej të paktën 6 166 vdekje nga mbidoza në lidhje me drogat e paligjshme në 27 vendet e BE-së, në vitin 2021. Kjo vlerësohet pothuajse 17 vdekje në ditë dhe dukshëm më shumë se në vitin 2020 (5 796) dhe 2019 (5 141). atsh