Arrestohen dy serbë në veri, iu gjetën armë, flamuj e emblema nacionaliste

Policia e Kosovës në veri të vendit ka arrestuar dy persona të dyshuar për veprën penale ‘posedim të paautorizuar të armëve dhe narkotikëve’. Të dyshuarve serbë iu gjetën armë, flamuj e emblema nacionaliste. Në raportin e Policisë, bëhet e ditur se të njëjtit ishin duke qarkulluar me një automjet me targa të Slovenisë. “Dy personat e dyshuar janë arrestuar dhe janë shoqëruar në stacion policor, pasi gjatë kontrollit të automjetit që drejtonin janë gjetur dhe janë konfiskuar disa pajisje të kundërligjshme, përfshirë maska kamuflazhi, emblema me simbole nacionaliste, dokumentacione etj. Dëshmitë e konfiskuara në cilësi të provave materiale, të cilat dyshohet se mund të përdoren për veprime të dhunshme janë: – një (1) shufër metalike (policore), – një (1) maskë kamuflazhi, – disa thika, – disa emblema me simbole nacionaliste (4 S) dhe flamur serb (4 S), – disa lloje të dyshuara të substancave narkotike, – telefona celularë, – sprej të ndryshëm, – sfera metalike, – lidhëse plastike, – një (1) automjet, – një (1) kartelë e veteranëve të luftës së Serbisë, dhe – një (1) kartelë të akademisë për siguri e Serbisë. – një (1) çekan etj”, bëhet e ditur në raport. Aty thuhet po ashtu se pas intervistimit, ndaj dy personave të dyshuar, me vendim të prokurorit kompetent, është caktuar masa e ndalimit prej 48 orëve. Policia e Kosovës do të vazhdojë të mbajë një ambient të sigurt dhe të qetë për të gjithë qytetarët e Republikës së Kosovës pa dallim, si dhe do të ndërmarrë masa ligjore ndaj veprimeve të kundërligjshme, që në çfarëdo mase do të rrezikonin sigurinë, qetësinë dhe stabilitetin në vend. atsh