Putin:E ardhme e mirë ekonomike pavarësisht sanksioneve

Pavarësisht sanksioneve të vendosura nga Perëndimi, presidenti rus Vladimir Putin shprehu optimizëm për perspektivat ekonomike të vendit gjatë një takimi sot me përfaqësuesit e biznesit. “Jam i bindur se Rusia ka një të ardhme të mirë”, tha Putin në një takim me përfaqësuesit e shoqatës së biznesit “Delovaya Rossiya”. “Ekzistojnë disa probleme ekonomike që duhet të kapërcehen, por zinxhirët e furnizimit po kthehen ngadalë në rrugën e duhur. Kjo është e mahnitshme. Edhe për mua”, tha Putin. Sanksionet e ashpra dhe tërheqja e shumë kompanive perëndimore nga tregu rus pas pushtimit ushtarak në shkallë të plotë të Moskës në Ukrainë, në shkurt 2022 shkaktuan tkurrjen e ekonomisë së vendit. Por, udhëheqësi i Kremlinit argumentoi se tërheqja e kompanive perëndimore ishte ‘një fat mes fatkeqësisë’, pasi krijoi vende të reja pune për prodhuesit rusë. Menjëherë pas fillimit të luftës, qeveria ruse ngriti një komision të posaçëm për të miratuar shitjen e pronave nga investitorët e huaj. Që atëherë, shumë kompani perëndimore i kanë shitur asetet e tyre në Rusi më pak se sa vlenin.