Papa Françesku: Armët shkatërrojnë çdo shpresë për paqe

Armët shkatërrojnë të gjithë shpresën për paqe, tha sot papa Françesku. “Lërini armët të heshtin, sepse armët nuk do ta arrijnë kurrë sigurinë, stabilitetin, përkundrazi, edhe çdo shpresë për paqe do të vazhdojë të shkatërrohet”, theksoi papa, në një apel të qartë për përfundimin e konfliktit mes izraelitëve dhe palestinezëve. ”Ditët e fundit kemi qenë përsëri dëshmitarë të përleshjeve të armatosura midis izraelitëve dhe palestinezëve, ku njerëz të pafajshëm, përfshirë gra dhe fëmijë, humbën jetën”, shtoi ai. ”Për këtë arsye shpresoj që armëpushimi që sapo është arritur do të jetë i qëndrueshëm”, përfundoi papa Françesku. Izraeli dhe grupet palestineze në Gaza kanë njoftuar armëpushim, pas sulmeve ajrore që Izraeli kryente ndaj Rripit të Gazës që nga 9 maji. Sipas informacionit të marra nga burimet e afërta me grupet palestineze, përpjekjet për armëpushim që Egjipti po kryen prej disa ditësh mes Tel Avivit dhe grupeve palestineze ka dhënë rezultate. Mësohet se Egjipti ka paraqitur një propozim të ri për një armëpushim në rajon dhe ky është pranuar nga grupet palestineze dhe Izraeli. Armëpushimi përfshin përfundimin e sulmeve dhe sigurimin që civilët të mos jenë në shënjestër. Palët e përfshira nuk kanë bërë ndonjë deklaratë zyrtare lidhur me çështjen. atsh