OKB: Irani ka ekzekutuar këtë vit të paktën 209 persona

Të paktën 209 persona janë ekzekutuar në Iran që nga fillimi i këtij viti, sipas shifrave të publikuara nga OKB. ‘’Numri i saktë i ekzekutimeve nuk dihet për shkak të mungesës së transparencës së qeverisë dhe ka të ngjarë të jetë më i lartë’’, theksoi organizata. “Ky është një rekord i neveritshëm, veçanërisht duke pasur parasysh konsensusin në rritje për heqjen universale të dënimit me vdekje,” deklaroi Komisioneri i Lartë i OKB-së për të Drejtat e Njeriut, Volker Türk. Ai u bëri thirrje autoriteteve iraniane që të ndalojnë të gjitha ekzekutimet dhe të heqin dënimin me vdekje. Irani është një nga vendet me numrin më të madh të ekzekutimeve në botë. Një iranian vendas me pasaportë suedeze u ekzekutua të shtunën. Të paktën 45 persona janë ekzekutuar vetëm në dy javët e fundit, thuhet në raport, shumë prej të cilëve janë dënuar për vepra të drogës. Një numër joproporcional i të ekzekutuarve u përkasin pakicave. atsh