Siguria ushqimore, AKU me të rinjtë në kryeqytet

Autoriteti Kombëtar i Ushqimit (AKU) e vijoi fushatën kombëtare për sigurinë ushqimore me një takim me të rinj të kryeqytetit. Nxënësit e shkollës së mesme të përgjithshme “Ismail Qemali” në Tiranë, u njohën me elementet dhe këshillat rreth sigurisë ushqimore. Interesi i nxënësve ishte i lartë duke drejtuar pyetje të ndryshme specialistëve të Autoritetit Kombëtar të Ushqimit. Drejtoresha e përgjithshme e AKU-së, Jeta Deda u shpreh për një angazhim të përgjithshëm nga të gjitha strukturat e linjës në shkallë vendi për rritjen e sigurisë ushqimore, teksa veçoi se, vëmendja e shtuar për sigurinë ushqimore po i kushtohet edhe ndërgjegjësimit të të rinjve për një ushqim të shëndetshëm. “Jemi besimplotë se fushata e ndërgjegjësimit do t’ia arrijë qëllimit të saj, në sensibilizimin e brezave të rinj mbi sigurinë ushqimore”, tha Deda. Gjatë bashkëbisedimit me ekspertët e ushqimit, të rinjtë treguan interes mbi rolin dhe misionin e AKU-së, përgjegjësitë e operatorëve të biznesit ushqimor në lidhje me sigurinë e produkteve ushqimore. AKU në fund të këtij procesi, pati kënaqësinë që të rinjve të “Ismail Qemalit” t’iu ndante certifikata si “Ambasadorë të sigurisë ushqimore”.