Spanja do të dërgojë tanke ”Leopard” në Ukrainë

Spanja do t’i dorëzojë Ukrainës gjashtë nga 10 tanket e betejës ”Leopard 2” që i kishte premtuar dhe kjo brenda disa ditësh, deklaroi ministri i Jashtëm, José Manuel Albares. “Pas kësaj do të ketë një paketë të dytë me katër tanke të tjera”, tha Albares për grupin mediatik gjerman ”Funke” në një intervistë të botuar sot. “Ne do ta mbështesim Ukrainën për aq kohë sa ajo ka nevojë për të”, tha ai. “Kjo përfshin ndihmën humanitare, pranimin e refugjatëve dhe furnizimin me armë mbrojtëse”, theksoi Albares. Javët e fundit, 55 ukrainas janë trajnuar për tanket ”Leopard” në Spanjë si anëtarë të ekuipazhit dhe teknikë. Madridi po dërgon ”Leopardë” që janë të tipit më të vjetër 2A4. Në total, Spanja ka 347 tanke ”Leopard”. Prej tyre, 108 i përkasin modelit 2A4 dhe 239 të tipit më të ri 2A6. Spanja nuk është zotuar t’i dorëzojë Ukrainës asnjë nga këto tanke më të reja, më të fuqishme duke argumentuar se ato janë të nevojshme për mbrojtjen e vendit. Forcat e armatosura të Ukrainës kanë marrë tashmë tanke ”Leopard 2” nga Gjermania, Kanadaja dhe Polonia. atsh