Ambasadorët amerikanë në Ballkan do mblidhen në Tiranë

Ambasadorët e Shteteve të Bashkuara të akredituar në vendet e Ballkanit Perëndimor do të mbajnë një takim në Tiranë me të dërguarin e posaçëm dhe koordinator i Qendrës për Angazhim Global, James Rubin. Departamenti Amerikan i Shtetit bën të ditur në njoftimin e publikuar në faqen zyrtare se ky takim do të mbahet në kuadër të turit 4-ditor që Rubin do të zhvillojë në tre shtete të rajonit. Zyrtari i lartë amerikan do të udhëtojë nga data 10 deri më 14 prill në Podgoricë, Shkup dhe Tiranë. Sipas këtij njoftimi, James Rubin “do të diskutojë përpjekjet e Rusisë, përpjekjet e Republikës Popullore të Kinës dhe aktorëve të tjerë dashakeq që përdorin dezinformatat për të minuar demokracinë dhe sigurinë kombëtare në mbarë botën dhe se si shtetet tona mund t’iu kundërvihen së bashku kërcënimeve në hapësirën e informacionit”. I dërguari i posaçëm dhe koordinator i Qendrës për Angazhim Global ka nisur të hënën turin në Malin e Zi, ku sipas medieve, ka pasur në qendër të vëmendjes luftën kundër dezinformacioneve. atsh